Ilantad ang Kahungkagan ng Pagpaparangal ni Gloria sa mga Migranteng Pilipino*
Pahayag ng Pakikiisa ng APL at ng LEARN sa Amend sa pagdiriwang ng Migrant Worker's Day
7 Hunyo 2002

Ang Alliance of Progressive Labor (APL) at ang Labor Education and Research Network (LEARN) ay mahigpit na nakikiisa sa Alliance of Migrant Workers and Advocates to Amend RA 8042 o AMEND sa pagdiriwang ngayon ng Araw ng mga Migranteng Manggagawa.

Bahagi ng aming mga mithiin at adbokasiya sa pagsusulong ng kabuuang kilusang paggawa ang pag-oorganisa at pag-eeduka ng mga Pilipinong marino, lalo’t yaong nagtatrabaho sa ibang bansa. Batid niyo naman na ang mga sea-based workers na ito ay kapilas ng mga land-based workers sa pagiging migranteng manggagawa, tawag din ay overseas Filipino workers o OFWs. Sa partikular, tinutulungan namin, kaagapay ng pandaigdigang kilusang unyon, ang MARINO at ang MMOA, na kapwa nakikipagtulungan sa AMEND. Kasali din ang LEARN sa mga koalisyon at iba pang kilusan para baguhin ang maka-kapitalistang Republic Act 8042 o ang Migrant Workers’ Act of 1995, kung saan nakakasama namin ang AMEND. Patunay lamang na magkakawing ang ating mga gawain at batayang layunin.

Kaya’t sa araw na ito atin muling ilantad ang kahungkagan ng ipinarangal ng ilang gobyerno na natin sa mga migrante o OFWs – ang pagturing sa kanila bilang “Mga Bagong Bayani.” Sapagkat sa kabila ng parangal na ito, patuloy at lumulubha pa nga ang katiwalian at pagkainutil ng pamahalaan at mga ahensiya nito sa dapat sana’y pag-aalalay sa at pag-aangat ng mga migrante. Sa gitna ito ng halos ang tumukod at tumutukod pa sa gigiwang-giwang nating pambansang ekonomya ay ang bilyon-bilyong ipinadadalang pera o remittances bawat taon ng mga migrante. Pinalala pa nga ito nang isinabatas ang RA 8042 pitong taon na ang nakararaan. Tampok sa batas na ito ang bulag na pagsunod sa ipinapataw ng globalisasyong neoliberal ngayon: ang walang patumanggang “liberalisasyon” – partikular ang “deregulasyon” daw ng sektor ng mga migrante o ang labor export market. Ibig sabihin, binabawasan kundi man tuluyang inaalis ang kapangyarihan ng estado para magtakda ng regulasyon upang hindi maabuso ang mga manggagawa. Sa gayon, sa halip na tugunan ng gobyerno ang matindi nang pang-aapi sa mga migrante, lalo pa silang iniwanan ngayon sa pansitan.

Lalong mahalaga, kung gayon, ang isiniselebra natin ngayon. Gawin natin ang Migrant Workers’ Day bilang pagpapatibay pa ng ating pagpupunyagi na labanan ang anumang uri ng panghuhuthot at paniniil sa mga migrante – gaya ng pagbaka natin para sa lubos na kalayaan at katarungan ng uring manggagawa at ng buong mamamayan, sa loob ng ating bansa at sa sandaigdigan.

Mabuhay ang mga Pilipinong Migrante!
Mabuhay ang mga Manggagawang Pilipino!
Mabuhay ang Kilusang Paggawa!

_______

This message of solidarity was read during the Migrant Worker's Day Concert held in UP Manila last 7 June 2002. 

Posted to the APL website 11-June-2002

HOME | ABOUT APL | PRESS STATEMENTS | POSITION PAPERS | BASIC DOCUMENTS 
RESOLUTIONS | AFFILIATES | FORUM | GUEST BOOK | LINKS